मराठी भाषा गौरव दिन आज राज्यभरात साजरा होत आहे.
२७ फेब्रुवारी हा कविवर्य कुसुमाग्रज म्हणजे विष्णू वामन शिरवाडकर यांचा जन्मदिवस. त्यांच्या जयंतीचं औचित्य साधून हा दिवस साजरा केला जातो. यानिमित्त राज्यभरात विविध कार्यक्रमाचं आयोजन करण्यात आलं आहे.
मुख्यमंत्री देवेंद्र फडणवीस, उपमुख्यमंत्री अजित पवार आणि एकनाथ शिंदे यांनी मराठी भाषा गौरव दिनानिमित्त शुभेच्छा दिल्या तसंच कुसुमाग्रजांना अभिवादन केलं. ज्येष्ठ नेते शरद पवार आणि काँग्रेसचे प्रदेशाध्यक्ष हर्षवर्धन सपकाळ यांनीही कुसुमाग्रजांच्या कार्याचं स्मरण करून त्यांना अभिवादन केलं. तसंच मराठी भाषा गौरव दिनाच्या शुभेच्छा दिल्या.
मराठी भाषा गौरव दिनाचं औचित्य साधून कवी कुसुमाग्रज यांच्या नाशिक जिल्ह्यातल्या शिरवाडे वणी या गावात ‘कवितेचं गाव’ साकार होत असल्याची माहिती, मराठी भाषा मंत्री उदय सामंत यांनी दिली. या गावात कुसुमाग्रजांचं साहित्य, कविता आणि अन्य थोर साहित्यिकांचं लेखन संग्रहित केलं जाणार आहे. शिरवाडे वणी इथं पुढल्या वर्षीपासूून कुसुमाग्रज महोत्सव आयोजित केला जाईल, अशी घोषणा यावेळी सामंत यांनी केली.
मराठी भाषेच्या गौरवार्थ आणि भाषा आणि साहित्याच्या विकासासाठी कार्यरत असणाऱ्या मान्यवरांच्या सन्मानार्थ, आज मुंबईतल्या गेटवे ऑफ इंडिया इथं पुरस्कार सोहळा आयोजित करण्यात आला आहे. या कार्यक्रमात विजेत्यांना मराठी साहित्यासाठीचे प्रतिष्ठेचे विविध पुरस्कार प्रदान करण्यात
येणार आहेत. राज्य साहित्य आणि संस्कृती मंडळाच्या ‘पुस्तक प्रकाशन’ उपक्रमांतर्गत विविध ५१ पुस्तकांचं प्रकाशनही यावेळी होणार आहे.