शेतकऱ्यांना ई पीक पाहणीसाठी आता १५ जानेवारीपर्यंत ऑफलाईन अर्ज करता येतील, असं महसूलमंत्री चंद्रशेखर बावनकुळे यांनी आज विधानसभेत सांगितलं. ​आमदार विक्रम पाचपुते यांनी यासंदर्भात लक्षवेधी सूचना मांडली होती. ई-पीक पाहणीसाठी तीन वेळा मुदतवाढ देऊनही अनेक शेतकरी तांत्रिक अडचणीमुळे नोंदणी करू शकले नाहीत, ई-पीक पाहणीची नोंद सातबाऱ्यावर असल्याशिवाय नाफेड किंवा शासकीय केंद्रांवर शेतमाल खरेदी केला जात नाही, त्यामुळे शेतकऱ्यांचं नुकसान होत असल्याचा मुद्दा त्यांनी उपस्थित केला. यावर ई-पीक पाहणीचं पोर्टल परत सुरू करणं तांत्रिकदृष्ट्या शक्य नाही. त्यामुळे ऑफलाईन अर्जाचा पर्याय दिल्याचं बावनकुळे यांनी सांगितलं.