नवी मुंबई विमानतळ मुंबईला जोडण्यासाठी बोगदा तयार करता येईल का याची चाचपणी करण्याचे निर्देश उपमुख्यमंत्री एकनाथ शिंदे यांनी महानगर आयुक्तांना दिले आहेत. शिंदे यांच्या उपस्थितीत आज M S R D C कार्यालयात बैठक झाली, त्यावेळी शिंदे बोलत होते. या बैठकीला उपमुख्यमंत्र्यांचे प्रधान सचिव नवीन सोना आणि महानगर आयुक्त डॉक्टर संजय मुखर्जी उपस्थित होते. या प्रकल्पाची व्यवहार्यता तपासण्यासाठी, भू-सागरीय वाहतुकीसाठी हा मार्ग उपयुक्त कसा ठरेल ते अभ्यासण्यासाठी तसंच एकूणच आरेखनासाठी तज्ज्ञांची मदत घेण्याच्या सूचनाही उपमुख्यमंत्री एकनाथ शिंदे यांनी दिल्या. मुंबई ते अहमदाबाद या बुलेट ट्रेन मार्गावर ठाणे जिल्ह्यातलं म्हातार्डी रेल्वे स्थानक, ठाणे स्थानक, कोपर रेल्वे स्थानक तसंच तळोजा मेट्रोला कसं जोडता येईल हे पाहण्याचे निर्देशही शिंदे यांनी आज दिले.