जम्मू काश्मीरमधल्या कुलगाम जिल्ह्यात आज सलग तिसऱ्या दिवशीही सुरक्षा दलाची शोध मोहीम सुरु आहे. यादरम्यान दहशतवाद्यांबरोबर झालेल्या चकमकीत आज आणखी एक दहशतवादी ठार झाला. आतापर्यंत या चकमकीत एकूण तीन दहशतवादी ठार झाले आहेत. शुक्रवारी रात्री ८ वाजता देवसरमधे अखलच्या जंगलात चार ते पाच दहशतवादी लपल्याची माहिती मिळाल्यावर लष्कराच्या ९ राष्ट्रीय रायफल्सनं जम्मू-काश्मीर पोलीस आणि  सीआरपीएफ जवानांसह शोध मोहीम सुरू केली आहे, अशी माहिती लष्करी कारवाईशी संबंधित एका अधिकाऱ्यानं दिली आहे. दहशतवादी लपल्याची शक्यता असलेल्या ठिकाणी उच्च तंत्रज्ञान आधारित पाळत यंत्रणा तैनात करण्यात आल्याचंही त्यांनी सांगितलं.