मुंबईत झालेल्या ‘हाऊस ऑफ इंस्टाग्राम’ कार्यक्रमात मेटा प्लॅटफॉर्म्स कंपनीनं भारतातल्या क्रिएटर्ससाठी ५ नव्या भारतीय भाषांचा समावेश केला आहे. यामुळे इंस्टाग्राम, फेसबुकवरील क्रिएटर्स लवकरच त्यांच्या रील्सचे बंगाली, मराठी, तेलुगु, कन्नड आणि तमिळ या भाषांमधे भाषांतर करू शकतील. यासाठी एआय-आधारित ऑटोमॅटिक डबिंग आणि लिप-सिंक सुविधा उपलब्ध करण्यात आली आहे. हे फिचर क्रिएटरच्या मूळ आवाजातील स्वर आणि भावना जुळवून भाषांतरित आवाज तयार करते यामुळे तोंडाच्या हालचाली नव्या भाषेशी हुबेहुब वाटते. यापूर्वी ही सुविधा इंग्रजी, हिंदी, स्पॅनिश आणि पोर्तुगीजपुरती मर्यादित होती.
याशिवाय मेटाच्या ‘एडिट्स’ या मोबाईल व्हिडिओ एडिटिंग अ‍ॅपमध्येही भारतीय भाषांसाठी नवे फॉन्ट्स जोडले जात आहेत. असमिया, बंगाली, हिंदी आणि मराठी भाषांसाठी देवनागरी तसेच बंगाली-असमिया स्क्रिप्टमधील आकर्षक फॉन्ट्स आता अँड्रॉइड अ‍ॅपमध्ये उपलब्ध होणार आहे.
