येत्या ५ वर्षात जॉर्डनबरोबरचा द्विपक्षीय व्यापार ५ अब्ज डॉलर करण्याचं उद्दिष्ट प्रधानमंत्री नरेंद्र मोदी यांनी ठेवलं आहे. सध्या हा व्यापार सुमारे सव्वा २ अब्ज डॉलर आहे. प्रधानमंत्री मोदी यांनी राजे अब्दुल्ला द्वितीय यांच्याशी जॉर्डनची राजधानी अम्मान इथं द्विपक्षीय चर्चा केली. तसंच उद्योजकांचीही भेट घेतली.
या दौऱ्यात एकूण ५ सामंजस्य करार झाले. त्यात पेट्रा आणि वेरुळ यांच्यात सांस्कृतिक देवाणघेवाण, पर्यटन विकासाच्या संदर्भातल्या कराराचा समावेश आहे. याशिवाय नवीकरणीय ऊर्जा, जलसंपदा या क्षेत्रातल्या करारांचा समावेश आहे.
जॉर्डनचा दौरा आटोपून संध्याकाळी प्रधानमंत्री इथियोपियाला पोचले. आदिस अबाबा विमानतळावर इथिओपियाचे प्रधानमंत्री डॉक्टर अबीय अहमद अली यांनी त्यांचं स्वागत केलं. उभय नेत्यांमधे भारत- इथियोपिया द्वीपक्षीय संबंधावर सर्वांगीण चर्चा होत असून परराष्ट्र मंत्रालयाचे प्रवक्ता रणधीर जैसवाल यांनी सांगितलं. प्रधानमंत्री नरेंद्र मोदी या दौऱ्यात तिथल्या संसदेच्या संयुक्त सत्राला संबोधित करणार आहेत. तिथल्या भारतीय समुदायालाही ते भेटणार आहेत.
इथिओपियानंतर प्रधानमंत्री ओमानला भेट देणार आहेत.
