उपराष्ट्रपती जगदीप धनखड यांच्या हस्ते काल मुंबईत केंद्रीय कापूस तंत्रज्ञान संशोधन संस्थेच्या शतकमहोत्सवी वर्षानिमित्त शतकमहोत्सवी स्तंभाचं उद्घाटन करण्यात आलं. तसंच संस्थेनं विकसित केलेली दोन नवी तंत्रज्ञानं आणि संस्थेच्या कामाशी संबंधित तीन पुस्तकांचं प्रकाशनही या कार्यक्रमात झालं. भारताला जगातली तिसऱ्या क्रमांकाची अर्थव्यवस्था बनवण्यात शेतकऱ्यांचा मोलाचा वाटा असेल असं सांगून देशाच्या अर्थव्यवस्थेच्या केंद्रस्थानी कृषी क्षेत्र आहे असं उपराष्ट्रपती यावेळी म्हणाले. शेती आणि शेतकऱ्यांच्या समृद्धीसाठी कृषी मंत्रालय आणि कृषी संशोधन विभागानं प्रयत्न करावेत असं त्यांनी सांगितलं. केंद्रिय कृषीमंत्री शिवराज सिंग चौहान, राज्यमंत्री रामनाथ ठाकूर, राज्यपाल सी. पी. राधाकृष्णन यांच्यासह अन्य मान्यवर या कार्यक्रमाला उपस्थित होते.