२०२६-२७ साठी आंतरराष्ट्रीय सागरी संघटना अर्थात IMO च्या परिषदेवर भारताची पुन्हा निवड झाली आहे. काल लंडन इथं झालेल्या IMO असेम्ब्लीच्या ३४व्या सत्रादरम्यान परिषदेच्या निवडणुका घेण्यात आल्या. आंतरराष्ट्रीय सागरी व्यापारात सर्वाधिक सहभाग असलेल्या दहा देशांच्या श्रेणीमध्ये भारताला सर्वाधिक म्हणजे १६९ वैध मतांपैकी १५४ मते मिळाली. केंद्रीय बंदरे, जहाजबांधणी आणि जलमार्ग मंत्री सर्बानंद सोनोवाल यांनी या बद्दल आनंद व्यक्त केला. हा भारताच्या सागरी क्षेत्रासाठी अभिमानाचा क्षण असल्याचं त्यांनी म्हंटलं आहे.

भारताला मिळालेली सर्वाधिक मतं ही जागतिक सागरी वाहतूक क्षेत्रामध्ये भारताच्या रचनात्मक नेतृत्वावर आंतरराष्ट्रीय समुदायाचा दृढ विश्वास दर्शवत असून हा निकाल म्हणजे भारत सरकारच्या शाश्वत सुधारणा आणि सागरी क्षेत्राला बळकटी देण्यासाठी केलेल्या भविष्यकालीन उपक्रमांना सर्वमान्यता असल्याचं मंत्रालयानं एका निवेदनात म्हटलं आहे. IMO परिषदेमध्ये तीन श्रेणींमध्ये निवडून आलेले ४० सदस्य असतात आणि ते असेम्ब्लीच्या सत्रांदरम्यान आयएमओची कार्यकारी संस्था म्हणून काम करतात.