५६ व्या भारतीय आंतरराष्ट्रीय चित्रपट महोत्सवाची काल एका रंगतदार सोहळ्यानं सांगता झाली. पणजीमधे गेले ९ दिवस चाललेला सोहळा रसिकांसाठी पर्वणी ठरला.  दिग्दर्शन अॅश मेफेअर दिग्दर्शित, व्हिएतनामच्या स्किन ऑफ यूथ या चित्रपटानं या महोत्सवाचा मुकुटमणी असलेल्या सूवर्ण मयूर पुरस्कारावर आपलं नाव कोरलं.

गोंधळ या मराठी चित्रपटासाठी दिग्दर्शक संतोष डावखर यांनी सर्वोत्कृष्ट दिग्दर्शकासाठीचा रौप्य मयूर पुरस्कार आपल्या नावे केला, अभिनयाच्या श्रेणीत, कोलंबियन अभिनेता उबेमर रिओस यांना ए पोएट मधील भूमिकेसाठी सर्वोत्कृष्ट अभिनेतेच्या, तर स्लोव्हेनियन चित्रपट लिटल ट्रबल गर्ल्स मधील भूमिकेसाठी जारा सोफिजा ओस्टान यांना सर्वोत्कृष्ट अभिनेत्री म्हणून गौरवलं गेलं. 

माय फादर्स शॅडो या नायजेरियन चित्रपटानं विशेष ज्युरी पुरस्कार मिळवला, तर सेफ हाऊस या नॉर्वेजियन चित्रपटानं प्रतिष्ठेचं ICFT-UNESCO गांधी पदक आपल्या नावे केलं. ओटीटी व्यासपीठाअंतर्गत बंडिश बँडिट्स सिझन टू ही सर्वोकृष्ट वेब मालिका ठरली, तर भारतीय चित्रपटांसाठी सर्वोत्कृष्ट पदार्पणीय दिग्दर्शक म्हणून केसरी चॅप्टर टू चे दिग्दर्शक करण सिंग त्यागी यांची निवड झाली.

या समारोप सोहळ्याचं विशेष आकर्षण ठरलं ते चित्रपटसृष्टीतील ५० वर्षांची कारकीर्द पूर्ण केल्याबद्दल सुपरस्टार रजनीकांत यांना प्रदान करण्यात आलेला जीवनगौरव पुरस्कार. आपल्याला १०० वर्षांनंतरही अभिनेता रजनीकांत म्हणूनच जन्माला यायला आवडेल अशी भावना रजनीकांत यांनी व्यक्त केली. 

दिवंगत अभिनेते धर्मेंद्र यांच्यासह सिने आणि कला क्षेत्रातील असंख्य भारतीय कलाकारांना महोत्सवात स्मरणांजली वाहिली गेली. याशिवाय सोहळ्याच्या प्रारंभीचा दिव्यांग व्यक्तींचा कलाविष्कार आणि इतर सादरीकरणं ही सिनेरसिकांसाठी पर्वणीच ठरली.

एकूणात हा सोहळा भारतीय चित्रपटसृष्टीतील कला आणि तंत्रज्ञानाचा गौरव करणारा आणि त्याचवेळी सिने जगताच्या नव्या वाटचालीची उमेद जागवणारा ठरला.