हज यात्रेशी निगडित सर्व प्रक्रिया डिजिटल करून मानवी हस्तक्षेप दूर करण्याच्या सूचना केंद्रीय अल्पसंख्यक सचिव चंद्र शेखर कुमार यांनी भारतीय हज समितीला दिल्या आहेत. मुंबईत झालेल्या हज परिषदेत ते बोलत होते. हज यात्रेसाठी अर्ज करण्यापासून यात्रेहून परत आल्यानंतर करायच्या प्रक्रिया सुद्धा डिजिटल करण्याची गरज त्यांनी व्यक्त केली.
हज यात्रेकरूंच्या थकीत रकमेपैकी ७५ टक्के त्वरित आणि उर्वरित २५ टक्के निर्धारित पडताळणी पूर्ण केल्यावर देण्याचे आदेश त्यांनी दिले. वित्तीय व्यवस्थापनासाठी व्यावसायिक सेवा पुरवठादाराची मदत घेण्याचा सल्ला देखील त्यांनी दिला.
हज यात्रेकरूंची यात्रा आधीच्या तुलनेत अधिक सुलभ, सोयीस्कर व्हावी यासाठी सर्व खबरदारी घेतली जाईल असं आश्वासन हज समितीचे मुख्य कार्यकारी अधिकारी शानवास सी. यांनी दिलं. देशाच्या विविध भागातून आलेल्या हज समितीच्या पदाधिकाऱ्यांनी यापूर्वी यात्रेत आलेल्या अडचणी मांडल्या. गेल्या आठवड्यात मृत्युमुखी पडलेल्या हज यात्रेकरूंना यावेळी आदरांजली वाहण्यात आली.
