प्रसिद्ध अभिनेता गोवर्धन असरानी यांचं काल मुंबईत दीर्घ आजारानं निधन झालं. ते ८४ वर्षांचे होते. सहाय्यक अभिनेता आणि विनोदी अभिनेता म्हणून नाव कमावलेल्या असरानी यांनी पुण्याच्या चित्रपट प्रशिक्षण संस्थेत अभिनयाचे धडे गिरवले होते. अभिमान, गुड्डी, चुपके चुपके अशा अनेक चित्रपटांमधे त्यांनी मुख्य कलाकारांच्या बरोबरीने प्रेक्षकांवर ठसा उमटवला होता. फकीरा आणि चला मुरारी हीरो बनने या चित्रपटांमधे त्यांनी मुख्य बूमिका साकारली होती. त्यांची शोले चित्रपटातील जेलरची भूमिका चिरस्मरणीय ठरली. मुंबईत काल त्यांच्या पार्थिवावर अंतिम संस्कार करण्यात आले.
प्रधानमंत्री नरेंद्र मोदी यांनी असरानी यांच्या निधनाबद्दल तीव्र दुःख व्यक्त केलं आहे. असरानी यांनी आपल्या भूमिकांमधून असंख्य प्रेक्षकांना आनंद दिला असं प्रधानमंत्र्यांनी शोकसंदेशात म्हटलं आहे. असरानी यांच्या निधनाबद्दल बॉलिवूडमधल्या मान्यवरांनी तसंच त्यांच्या चाहत्यांनी हळहळ व्यक्त केली आहे.
