गाझापट्टीत शांतता प्रस्थापित करणं आणि उद्ध्वस्त झालेल्या भागांचं पुनर्निर्माण करण्याचा अमेरिकेचा प्रस्ताव संयुक्त राष्ट्र सुरक्षा परिषदेत पारीत झाला आहे. १५ सदस्यीय परिषदेत १३ जणांनी प्रस्तावाच्या बाजूने मतदान केलं तर रशिया आणि चीनने मतदानात सहभाग घेतला नाही. या प्रस्तावानुसार आता शांतता समितीची तसंच आंतरराष्ट्रीय स्थैर्य दलाची स्थापना केली जाईल.
शांतता समितीचं अध्यक्षपद आपण भूषवणार असल्याचं अमेरिकेचे राष्ट्राध्यक्ष डोनाल्ड ट्रम्प यांनी सांगितलं. आंतरराष्ट्रीय स्थैर्य दलामधे विविध देशांचे सैनिक असतील. यात मुस्लिमबहुल देशांच्या सैनिकांचाही समावेश असेल. हे सैनिक गाझामधे तैनात करण्यात येतील. तसंच मदत आणि बचाव साहित्य गरजूंपर्यंत पोहोचेल याची काळजी घेतली जाईल, असं संयुक्त राष्ट्रातले अमेरिकेचे राजदूत मायकल वाल्टज् यांनी सांगितलं.
