दिल्लीत लाल किल्ल्याजवळ स्फोट घडवणारी व्यक्ती डॉ. उमर उन नबी असल्याचं डीएनए चाचणीतून स्पष्ट झालं आहे. स्फोटानंतर त्याचा पाय स्टीअरिंग व्हील आणि अ‍ॅक्सिलरेटरमध्ये अडकला होता. त्याचा डीएनए नमुना त्याच्या आईशी जुळला असल्याची माहिती, दिल्ली पोलिसांनी दिली.

दरम्यान, दिल्ली मेट्रोचं लाल किल्ला स्थानक सुरक्षेच्या कारणास्तव पुढची सूचना मिळेपर्यंत बंद राहील असं मेट्रो रेल कॉर्पोरेशनने कळवलं आहे. या तपासादरम्यान, अलफलाह विद्यापीठाच्या आवारातून आज आणखी एक कार पोलिसांनी ताब्यात घेतली. हे वाहन, संशयित शाहीन शाहीदच्या नावावर असल्याचं समजतं. काल दिल्लीत सर्व पोलीस ठाणी, तपासणी नाके तसंच हरयाणा, उत्तर प्रदेश पोलिसांसाठी दक्षतेचा इशारा जारी केला आहे.  जम्मू काश्मीरमधे जैश ए मुहम्मद या प्रतिबंधित संघटनेशी संबंधित १३ ठिकाणांवर  आज छापे टाकण्यात आले.