महिला विश्वचषक क्रिकेट स्पर्धा आजपासून सुरु होणार आहे. उद्घाटनाचा सामना गुवाहाटी इथं भारत आणि श्रीलंका यांच्यात होणार आहे. भारत या स्पर्धेचं आयोजन करत आहे.
२ नोव्हेंबरपर्यंत चालणाऱ्या या स्पर्धेत आठ संघांमध्ये ३१ सामने होतील. गुवाहाटी, इंदूर, विशाखापट्टणम आणि नवी मुंबई इथं हे सामने होणार आहेत. मात्र पाकिस्तानचे सर्व सामने श्रीलंकेत कोलंबो इथं होतील. भारत आणि पाकिस्तान यांच्यातला सामना ५ ऑक्टोबरला कोलंबोमध्ये होईल. २९ आणि ३० ऑक्टोबरला उपांत्य सामने होतील. अंतिम सामना २ नोव्हेंबरला नवी मुंबईत डीवाय पाटील स्टेडियमवर होईल. मात्र पाकिस्तानचा संघ अंतिम फेरीत पोहोचला तर हा सामना कोलंबोमधे होईल.
२६ ऑक्टोबरला रोजी इंग्लंड आणि न्यूझीलंड यांच्यातला सामना सकाळी ११ वाजता सुरू होईल. इतर सर्व सामने दुपारी ३ वाजता सुरू होणार आहेत.
आंतरराष्ट्रीय क्रिकेट परिषदेनं महिला एकदिवसीय विश्वचषकासाठी बक्षीसाची रक्कम सुमारे १२२ कोटी रुपये, म्हणजे गेल्या वेळच्या तुलनेत चौपट केली आहे. ही रक्कम पुरुष विश्वचषकापेक्षा ३९ कोटी रुपयांनी जास्त आहे.
