इस्रायल आणि पॅलेस्टाईन संघर्षाच्या पार्श्वभूमीवर गाझामध्ये कायमस्वरुपी शांतता प्रस्थापित करण्याच्या दिशेनं काम करण्याच्या उद्देशानं निर्माण करण्यात आलेल्या गटात अर्थात ‘बोर्ड ऑफ पीस’मध्ये सहभागी होण्यासाठी अमेरिकेचे राष्ट्राध्यक्ष डोनाल्ड ट्रम्प यांनी प्रधानमंत्री नरेंद्र मोदी यांना आमंत्रित केलं आहे. अमेरिकेच्या राष्ट्राध्यक्षांनी या संदर्भात मोदी यांना पत्र पाठवलं आहे, अमेरिकेचे भारतातले राजदूत सर्जियो गोर यांनी हे पत्र समाजमाध्यमावर शेअर केलं आहे. अमेरिकेच्या राष्ट्राध्यक्षांनी गाझा पट्टीत इस्रायल आणि हमास यांच्यातील युद्धविराम कराराच्या दुसऱ्या टप्प्याचा भाग म्हणून या गटाची स्थापना केली आहे. गेल्या ऑक्टोबरमध्ये, इस्रायल आणि हमास या गटानं ट्रम्प यांच्या शांतता योजनेला सहमती दर्शवली होती. मध्य पूर्वेत शांतता प्रस्थापित करण्यासाठी वीस कलमी आराखडा तयार करण्यात आला आहे.