हिमाचल प्रदेशात काल रात्री तीन ठिकाणी झालेला मुसळधार पाऊस आणि ढगफुटीमुळे मोठ्या प्रमाणावर नुकसान झाल्याचं वृत्त आहे. त्यानंतर आलेल्या पुरात ५५ जण बेपत्ता झाले असून २ जणांचा मृत्यू झाला आहे. या ढगफुटीमुळे शिमला जिल्ह्यात ३६ जण तर मंडी जिल्ह्यात ९ जण बेपत्ता झाले असून २ मृतदेह सापडले आहेत, अशी माहिती उपायुक्त अनुपम कश्यप यांनी दिली. शिमल्याच्या रामपूर उपविभाग प्रशासनानं एनडीआरएफ आणि सीआयएसएफ च्या तुकड्यांच्या मदतीनं बचावकार्य सुरु केल्याचं त्यांनी सांगितलं.