प्रधानमंत्री नरेंद्र मोदी उद्या नवी दिल्लीतील राय पिथोरा सांस्कृतिक संकुलात भगवान गौतम बुद्धांशी संबंधित पिप्रहवा अवशेषांच्या आंतरराष्ट्रीय प्रदर्शनाचं उद्घाटन करणार आहेत. एक शतकाहून अधिक काळानंतर परत आणलेल्या, पिप्रहवा अवशेषांसह राष्ट्रीय संग्रहालय, नवी दिल्ली आणि भारतीय संग्रहालय, कोलकाता यांच्या संग्रहात जतन केलेले पिप्रहवा अवशेष आणि इतर पुरातत्वीय साहित्य या प्रदर्शनात पहिल्यांदाच बघता येईल.

1898 मध्ये पिप्रहवा इथे सापडलेले अवशेष, प्राचीन बौद्ध धर्माच्या पुरातत्व अभ्यासात महत्वाचे आहेत. भगवान बुद्धांनी त्यांचं सुरुवातीचं जीवन पिप्रहवा इथं व्यतीत केलं होतं अशी मान्यता आहे. हे प्रदर्शन बौद्ध धर्माच्या शिकवणींशी असलेलं भारताचं अतूट नातं दर्शवतं. आध्यात्मिक आणि सांस्कृतिक वारसा जपण्यासाठी सरकारचे प्रयत्नही यामधून स्पष्ट होतात.