‘नासा’, या अमेरिकेच्या अंतराळ संशोधन संस्थेने, आपलं नवीन शक्तिशाली चांद्र-यान प्रक्षेपकापर्यंत पोहोचवलं आहे. हे यान अंतराळवीरांना घेऊन चंद्रप्रदक्षिणा करणार आहे. ३२२ फूट लांबीचं एसएलएस, म्हणजेच स्पेस लाँच सिस्टम- रॉकेट काल फ्लोरिडामधल्या केनेडी स्पेस सेंटरमधून लाँच पॅडवर नेण्यात आलं.
फेब्रुवारीच्या सुरुवातीला हे यान चार अंतराळवीरांना चंद्राच्या कक्षेत घेऊन जाईल आणि १० दिवसांच्या प्रवासानंतर परत येईल. काही तांत्रिक कारणांमुळे यानाचं प्रक्षेपण अनेक वर्ष होऊ शकलं नाही. या अभियानात अंतराळवीर चंद्रावर उतरणार नाहीत, मात्र भविष्यात ही गोष्ट साध्य करण्याच्या दृष्टीनं ही मोहीम महत्त्वाची समजली जात आहे.
