भारतीय राष्ट्रीय महामार्ग प्राधिकरणानं काल स्वातंत्र्यदिनी देशभरातल्या एक हजार १५० पथकर नाक्यांवर फास्टटॅग वार्षिक पास सुविधा सुरू केली. काल संध्याकाळी सात वाजेपर्यंत १ लाख ४० हजार जणांनी हा पास खरेदी केल्याचं रस्ते वाहतूक आणि महामार्ग मंत्रालयानं सांगितलं. यात महाराष्ट्रातल्या नाशिक-पेठ, सूरत-दहिसर, सातारा-कागल, पुणे-सोलापूर, खंडाळा-सातारा, सांगली-सोलापूर, पाटस-बारामती, नागपूर-कोंढली, नागपूर-हैदराबाद, अमरावती-चिखली, करोडी-छत्रपती संभाजीनगर, मंठा-परतूर, वर्धा-बुट्टीबोरी इत्यादी ९६ मार्गांवरल्या पथकर नाक्यांचा समावेश आहे. वाहनचालकांना पथकर नाक्यावर पासची सुविधा विनाअडथळा मिळावी यासाठी राष्ट्रीय महामार्ग प्राधिकरणानं प्रत्येक नाक्यावर अधिकाऱ्याची नियुक्ती केली आहे. एकाच वेळी ३ हजार रुपयांचा हा पास रीचार्ज केल्यानंतर वाहनचालकांना वारंवार पास रीचार्ज करण्याची गरज उरणार नाही. या पासची मुदत एक वर्ष किंवा दोनशे पथकर नाक्यांसाठी असेल. हा पास फक्त खासगी वाहनांसाठी तसंच राष्ट्रीय महामार्ग आणि द्रुतगती मार्गांसाठीच वैध असेल.