કેન્દ્રીય શિક્ષણમંત્રી ધર્મેન્દ્ર પ્રધાને કહ્યું છે કે નેશનલ ટેસ્ટિંગ એજન્સી,NTA આગામી વર્ષથી શૈક્ષણિક સંસ્થાઓમાં પ્રવેશ માટે માત્ર સ્પર્ધાત્મક પ્રવેશ પરીક્ષાઓ જ લેશે અને કોઈ ભરતી પરીક્ષાઓ યોજશે નહીં. નવી દિલ્હીમાં એક પત્રકાર પરિષદને સંબોધતા તેમણે કહ્યું કે ત્રૂટી મુક્ત પરીક્ષાઓ યોજવાનો અને જવાબદારી નક્કી કરવાનો આ નવો અભિગમ છે. શ્રી પ્રધાને જણાવ્યું હતું કે, શિક્ષણ અને આરોગ્ય મંત્રાલયો તબીબી પ્રવેશ પરીક્ષા NEET-UG પેન-એન્ડ-પેપર મોડમાં કે ઓનલાઈન મોડમાં લેવા અંગે વિચારણા કરી રહ્યા છે. મંત્રીએ કહ્યું કે, NEET-UG માટેની વિગતવાર મોડલિટી 2-3 અઠવાડિયામાં જાહેર થવાની સંભાવના છે. તેમણે કહ્યું કે CUET-UG વર્ષમાં એક વખત યોજવાનું ચાલુ રહેશે. શિક્ષણ મંત્રીએ પરીક્ષાના સરળ અને ન્યાયી સંચાલન અને NTAને મજબૂત કરવા માટે ISROના ભૂતપૂર્વ અધ્યક્ષ કે રાધાકૃષ્ણનની આગેવાની હેઠળની સમિતિની ભલામણો શેર કરી હતી.