આંતર-રાષ્ટ્રીય ક્રિકેટ પરિષદ – ICC મહિલા એક દિવસીય ક્રિકેટ વિશ્વકપની બીજી સૅમિ-ફાઈનલમાં આજે ભારત અને ઑસ્ટ્રેલિયા વચ્ચે મૅચ રમાશે. નવી મુંબઈના ડૉક્ટર ડી. વાય. પાટિલ રમતગમત અકાદમીમાં બપોરે ત્રણ વાગ્યાથી આ મૅચ શરૂ થશે. આકાશવાણી બપોરે અઢી વાગ્યાથી મૅચનું અંગ્રેજી અને હિન્દી બંનેમાં સીધું પ્રસારણ કરશે.
આ પહેલા, દક્ષિણ આફ્રિકા ગઈકાલે ઇંગ્લૅન્ડને સૅમિ-ફાઈનલની પહેલી મૅચમાં 125 રનથી હરાવી ફાઈનલમાં પહોંચ્યું છે. પહેલા બેટિંગ કરીને દક્ષિણ આફ્રિકાની ટીમે નિર્ધારિત 50 ઑવરમાં સાત વિકેટ ગુમાવી 319 રન બનાવ્યા. જવાબમાં ઇંગ્લૅન્ડ 42 ઑવર ત્રણ બૉલમાં 194 રન પર આઉટ થઈ ગયું હતું.