કેન્દ્રીય આરોગ્ય મંત્રી જયપ્રકાશ નડ્ડાએ જણાવ્યું છે કે, દેશી રાજ્યોના વિલિનીકરણ બાદ સરદાર પટેલે ભારત દેશના ભવિષ્યનું જે સ્વપ્ન જોયું હતું, તેને પ્રધાનમંત્રી સાકાર કરી રહ્યા છે. બંધારણની કલમ ૩૭૦ નાબૂદ કરી પ્રધાનમંત્રીએ દેશને ખરા અર્થમાં એક કર્યો છે.
ભારત રત્ન સરદાર વલ્લભભાઇ પટેલની ૧૫૦મી જન્મ જયંતીની રાષ્ટ્રવ્યાપી ઉજવણીના ઉપલક્ષમાં કરમસદથી કેવડિયા સુધી નીકળેલી રાષ્ટ્રીય એકતા પદયાત્રાના વડોદરા શહેરમાં પ્રવેશ સમયે કેન્દ્રીય આરોગ્ય મંત્રી નડ્ડા તેમાં સહભાગી થયા હતા.
અટલાદરા સ્વામિનારાયણ મંદિર સભાગૃહમાં યોજાયેલી સરદાર ગાથામાં શ્રી નડ્ડાએ ભારપૂર્વક જણાવ્યું કે સરદાર પટેલ આપણા સાચા રાષ્ટ્રીય નાયક હતા.
કેન્દ્રીય મંત્રી મનસુખ માંડવિયાએ રાષ્ટ્રવ્યાપી એકતા અને વિકાસના સંદેશને ઉજાગર કર્યો હતો. તેમણે જણાવ્યું કે દેશભરમાં એક હજાર 500થી વધુ એક દિવસીય પદયાત્રાઓ યોજાઈ હતી, અને ગુજરાત સરકારે પણ રાજ્યના ૧૮૨ વિધાનસભા મતવિસ્તારોમાંથી દરેકમાં એક દિવસીય પદયાત્રાઓનું આયોજન કર્યું હતું.
શ્રી માંડવિયાએ આ પદયાત્રાના વૈચારિક મહત્વ પર ભાર મૂકતા કહ્યું કે આ માત્ર પગપાળા કૂચ નથી, પરંતુ તે એક વૈચારિક યાત્રા છે જે દેશમાં એકતાનો સંદેશ ફેલાવે છે.
ગુજરાત પ્રદેશ પ્રમુખ જગદીશ વિશ્વકર્માએ જણાવ્યું કે સરદાર વલ્લભભાઈ પટેલના અખંડ ભારતના સ્વપ્નને સાકાર કરવા માટે રાષ્ટ્રવ્યાપી સ્તરે એકતા અને અખંડતાનો સંકલ્પ વધુ મજબૂત બની રહ્યો છે.