સંસદના બંને ગૃહોની કાર્યવાહી અનિશ્ચિત સમય માટે સ્થગિત કરી દેવામાં આવી છે. ગઈકાલે ગૃહની કાર્યવાહી શરૂ થઈ ત્યારે વિપક્ષી સભ્યોએ કેન્દ્રીય ગૃહમંત્રી અમિત શાહના ડૉ. આંબેડકર પરના નિવેદન પર સૂત્રોચ્ચાર શરૂ કર્યા હતા. અધ્યક્ષ ઓમ બિરલાએ સાંસદોને નિયમોનું ચુસ્તપણે પાલન કરવા અને સંસદના કોઈપણ ગેટ પર વિરોધ પ્રદર્શન કરવાથી દૂર રહેવા વિનંતી કરી.
બીજી તરફ રાજ્યસભામાં હંગામાને કારણે ગૃહની કાર્યવાહી પહેલા ગઈકાલે બપોરે 12 વાગ્યા સુધી સ્થગિત કરવામાં આવી હતી. અધ્યક્ષ જગદીપ ધનખડે સાંસદોને વિનંતી કરી કે તેઓ જનતાના વિશ્વાસ અને અપેક્ષાઓનું સન્માન કરે.
ગૃહની કાર્યવાહી ફરી શરૂ થઈ ત્યારે વન નેશન વન ઈલેક્શન બિલ માટે સંસદની સંયુક્ત સમિતિના 12 સભ્યોને નામાંકિત કરવાનો પ્રસ્તાવ મૂકવામાં આવ્યો હતો. શ્રી ધનખડે સમાપન સત્રમાં ખેદ વ્યક્ત કરતાં કહ્યું હતું કે આ સત્રમાં વિક્ષેપોને કારણે કામના કલાકો લગભગ 40 ટકા હતા. શ્રી ધનખડે જણાવ્યું હતું કે નિયમ 267 હેઠળ અયોગ્ય રીતે પ્રસ્તાવ મૂકવો એ ખેદજનક છે અને ગૃહને ગૌરવ સાથે કામ કરવું જોઈએ. બાદમાં તેમણે રાજ્યસભાની કાર્યવાહી સ્થગિત કરી દીધી હતી. સંસદનું શિયાળુ સત્ર ગયા મહિનાની 25 તારીખે શરૂ થયું હતું.