વેનેઝુએલાના નેતા નિકોલસ માદુરોએ ન્યુ યોર્ક સિટીની ફેડરલ કોર્ટમાં હાજરી દરમિયાન અનેક ફેડરલ આરોપોમાં પોતાને નિર્દોષ ગણાવ્યા. ન્યુ યોર્કમાં અમેરિકી ફેડરલ કોર્ટ સમક્ષ પોતાની પહેલી હાજરી દરમિયાન, માદુરોએ તેમની ધરપકડની કાયદેસરતા પર પ્રશ્ન ઉઠાવ્યો, અને દાવો કર્યો કે તેમને વેનેઝુએલાના કારાકાસમાં તેમના નિવાસસ્થાનેથી અટકાયતમાં લેવામાં આવ્યા હતા. આ નિવેદન સૂચવે છે કે તેમની કાનૂની બચાવ વ્યૂહરચનાનો મુખ્ય મુદ્દો એ હશે કે વિદેશી ધરતી પર અમેરિકી કાયદા અમલીકરણ એજન્સીઓ દ્વારા તેમની ધરપકડ ગેરકાયદેસર કાર્યવાહી હતી. માદુરોની કાનૂની ટીમે આ ધરપકડને લશ્કરી અપહરણ તરીકે વર્ણવી છે અને દલીલ કરી છે કે મોડી રાતની આ કાર્યવાહી આંતરરાષ્ટ્રીય કાયદા અને યોગ્ય પ્રક્રિયાની જોગવાઈઓનું ઉલ્લંઘન કરે છે. બચાવ પક્ષ વેનેઝુએલાના નેતાની અટકાયતની આસપાસના સંજોગો પર પ્રશ્ન ઉઠાવીને અમેરિકી કોર્ટના અધિકારક્ષેત્રને પડકારી શકે છે. વેનેઝુએલાની સરકારે દેશમાં વિદેશી હસ્તક્ષેપ સામે હુકમનામુ બહાર પડ્યું છે. આ હુકમનામામાં રાષ્ટ્રપતિને વ્યાપક સત્તાઓ આપવામાં આવી છે અને વેનેઝુએલા પર અમેરિકી આક્રમણને પ્રોત્સાહન આપનાર અથવા સમર્થન આપનાર કોઈપણ વ્યક્તિની ધરપકડ કરવાનો નિર્દેશ આપવામાં આવ્યો છે. શનિવારે જારી કરાયેલા આ હુકમનામા પર તત્કાલીન રાષ્ટ્રપતિ નિકોલસ માદુરો દ્વારા હસ્તાક્ષર કરવામાં આવ્યા હતા. આ હુકમનામું કાયદાની જેમ કાર્ય કરશે અને 90 દિવસ સુધી અમલમાં રહેશે, જેમાં તેને બીજા 90 દિવસ માટે લંબાવવાનો વિકલ્પ પણ છે.