સરકારે લોકસભામાં “વિકસિત ભારત – રોજગાર અને આજીવિકા મિશન (ગ્રામીણ) માટે ગેરંટી” બિલ 2025 રજૂ કર્યું. આ કાયદો વીસ વર્ષ જૂના મહાત્મા ગાંધી રાષ્ટ્રીય ગ્રામીણ રોજગાર ગેરંટી અધિનિયમ, 2005 (મનરેગા)ને બદલશે. આ કાયદા હેઠળ દરેક ગ્રામીણ પરિવારને દર નાણાકીય વર્ષમાં એકસો પચીસ દિવસના વેતન રોજગારની વૈધાનિક ગેરંટી આપવામાં આવશે.પાણી સંબંધિત કાર્યો, મુખ્ય ગ્રામીણ માળખાગત સુવિધાઓ, આજીવિકા સંબંધિત માળખાગત સુવિધાઓ અને પ્રતિકૂળ હવામાન ઘટનાઓ અને આપત્તિ તૈયારીઓની અસરને ઘટાડવાના હેતુથી વિશેષ કાર્યો દ્વારા પાણીની સુરક્ષાને વિષયોની પ્રાથમિકતા આપવામાં આવશે. આ અભિગમ દેશભરમાં ઉત્પાદક, ટકાઉ, સ્થિતિસ્થાપક અને પરિવર્તનશીલ ગ્રામીણ સંપત્તિનું નિર્માણ સુનિશ્ચિત કરશે. બિલ રજૂ કરતા ગ્રામીણ વિકાસ મંત્રી શિવરાજ સિંહ ચૌહાણે જણાવ્યું કે, યુપીએ સરકાર દરમિયાન, મહાત્મા ગાંધી રાષ્ટ્રીય ગ્રામીણ રોજગાર ગેરંટી અધિનિયમ (મનરેગા) પર બે લાખ 13 હજાર કરોડ રૂપિયા ખર્ચ કરવામાં આવ્યા હતા, જ્યારે મોદી સરકારે આ યોજના પર આઠ લાખ 53 હજાર કરોડ રૂપિયાથી વધુ ખર્ચ કર્યા છે. શ્રી ચૌહાણે જણાવ્યું કે આ નવા બિલ દ્વારા, સરકારે રોજગારના ગેરંટીકૃત દિવસોને 100 દિવસથી વધારીને 125 દિવસ કરવાનો પ્રસ્તાવ મૂક્યો છે. તેમણે કહ્યું કે, આ બિલ હેઠળ એક લાખ 51 હજાર કરોડ રૂપિયાથી વધુની જોગવાઈ કરવામાં આવી છે. મંત્રીએ ભારપૂર્વક જણાવ્યું કે આ બિલ ગામડાઓનો વ્યાપક વિકાસ સુનિશ્ચિત કરશે અને આત્મનિર્ભર અને વિકસિત ગ્રામીણ વિસ્તારોના નિર્માણમાં મદદ કરશે.