રાષ્ટ્રપતિ દ્રૌપદી મુર્મુએ કહ્યું છે કે વંચિત વર્ગો પ્રત્યે સંવેદનશીલતા દેશ કે સમાજની પ્રતિષ્ઠા નક્કી કરે છે. ગઈકાલે સાંજે રાષ્ટ્રપતિ ભવનમાં આયોજિત પર્પલ ફેસ્ટમાં બોલતા, શ્રીમતી મુર્મુએ જણાવ્યું હતું કે કરુણા, સમાવેશકતા અને સંવાદિતા ભારતીય સંસ્કૃતિ અને સભ્યતાના મૂલ્યો રહ્યા છે. પર્પલ ફેસ્ટનો ઉદ્દેશ્ય વિવિધ પ્રકારની વિકલાંગતાઓ અને લોકોના જીવન પર તેમની અસર વિશે જાગૃતિ લાવવાનો છે. તેનો ઉદ્દેશ્ય સમાજમાં વિકલાંગ વ્યક્તિઓની સમજ, સ્વીકૃતિ અને સમાવેશને પ્રોત્સાહન આપવાનો પણ છે.
ગઈકાલે રાષ્ટ્રપતિ ભવનના અમૃત ઉદ્યાનમાં એક દિવસીય પર્પલ ફેસ્ટનું આયોજન કરવામાં આવ્યું હતું. જેમાં દિવ્યાંગોની પ્રતિભા, સિદ્ધિઓ અને આકાંક્ષાઓની ઉજવણી કરવામાં આવી. આ કાર્યક્રમનું આયોજન સામાજિક ન્યાય અને સશક્તિકરણ મંત્રાલય હેઠળના દિવ્યાંગ વ્યક્તિઓના સશક્તિકરણ વિભાગ દ્વારા કરવામાં આવ્યું હતું.
રાષ્ટ્રપતિ દ્રૌપદી મુર્મુએ પર્પલ ફેસ્ટમાં ઉપસ્થિત રહી દિવ્યાંગો દ્વારા રજૂ કરાયેલા સાંસ્કૃતિક કાર્યક્રમો પણ નિહાળ્યા.
સામાજિક ન્યાય અને અધિકારીતા મંત્રી ડૉ. વીરેન્દ્ર કુમારે પર્પલ ફેસ્ટના ઉદ્ઘાટન બાદ પત્રકારોને જણાવ્યું હતું કે 2016 માં વિકલાંગ વ્યક્તિઓના અધિકારો અધિનિયમ લાગુ થવાથી, વિકલાંગ વ્યક્તિઓની સુલભતા, વિશ્વાસ અને આત્મવિશ્વાસમાં નોંધપાત્ર વધારો થયો છે. તેમણે કહ્યું કે આ વર્ષે પર્પલ ફેસ્ટ માટે 65 હજાર લોકોએ નોંધણી કરાવી હતી અને લગભગ 25 હજાર લોકોએ સક્રિયપણે ભાગ લીધો હતો. આ કાર્યક્રમ દરમિયાન, શ્રી કુમારે પ્રદર્શન અને વેચાણ માટે રાખવામાં આવેલા ઉત્પાદનોની મુલાકાત લીધી. તેમણે કાર્યક્રમમાં ભાગ લેનારા દિવ્યાંગ લોકો સાથે પણ વાતચીત કરી.