અમેરિકાના રાષ્ટ્રપતિ ડોનાલ્ડ ટ્રમ્પે અમેરિકા માટે 175 અબજ ડોલરના ગોલ્ડન ડોમ મિસાઈલ સંરક્ષણ કવચ કાર્યક્રમની જાહેરાત કરી છે. આ મહત્વાકાંક્ષી કાર્યક્રમ ચીન અને રશિયાથી સંભવિત ખતરાને કાબૂમાં લેવાના હેતુથી શરૂ કરવામાં આવી રહ્યો છે. અમેરિકન સ્પેસ ફોર્સના જનરલ માઈકલ ગેટલીનને આ કવચનાં વડા તરીકે નિયુક્ત કરવામાં આવ્યા છે. ગઈકાલે રાત્રે વ્હાઇટ હાઉસમાં પત્રકાર પરિષદમાં રાષ્ટ્રપતિ ટ્રમ્પે કહ્યું હતું કે, ગોલ્ડન ડોમ અમેરિકાને લાંબા અંતરની મિસાઇલોથી બચાવશે. આ પહેલ ઇઝરાયલના સંરક્ષણ કવચ આયર્ન ડોમથી પ્રેરિત છે પરંતુ તે પ્રમાણમાં વધુ વિશાળ છે. ગોલ્ડન ડોમ દ્વારા સેંકડો મિસાઇલ તૈનાત કરી શકાય છે. આ પ્રોજેક્ટ ટ્રમ્પના કાર્યકાળ જાન્યુઆરી, 2029 સુધી પૂર્ણ થઈ જશે. શ્રી ટ્રમ્પે જણાવ્યું કે, કેનેડાએ પણ આ યોજનામાં જોડાવા રસ દર્શાવ્યો છે.