નવા વર્ષની ઉજવણીને લઈ માઉન્ટ આબુની સાથે સ્ટેચ્યૂ ઑફ યુનિટીમાં પ્રવાસીઓનો ધસારો જોવા મળી રહ્યો છે. આ સમયગાળા દરમિયાન લોકો ઠંડીનો પણ અનુભવ કરી રહ્યા છે. માઉન્ટ આબુ હાલ શીતલહેરની ઝપટમાં છે. હાલમાં તેનું તાપમાન શૂન્ય ડિગ્રી સેલ્સિયસ નજીક પહોંચતાં લોકોને કડકડતી ઠંડીનો અનુભવ થઈ રહ્યો છે.
બીજી તરફ, હવામાન વિભાગે આગામી ત્રણ દિવસ લઘુત્તમ તાપમાનમાં કોઈ મોટો ફેરફાર થવાની શક્યતા નહીંવત્ હોવાની આગાહી કરી છે. વિભાગે જણાવ્યું, ગત 24 કલાકમાં 11 ડિગ્રી સેલ્સિયસ તાપમાન સાથે કચ્છનું નલિયા સૌથી ઠંડું શહેર રહ્યું છે. જ્યારે કંડલા વિમાનમથક અને ડીસામાં લઘુત્તમ તાપમાન 13 ડિગ્રી સેલ્સિયસ તાપમાન નોંધાયું. જ્યારે અન્ય જિલ્લા અને શહેરમાં લઘુત્તમ તાપમાન 13 ડિગ્રી સેલ્સિયસથી વધુ રહ્યાના અહેવાલ છે.