રાજ્યના તમામ જિલ્લામાં આગામી 6 દિવસ ગાજવીજ સાથે હળવાથી મધ્યમ વરસાદની આગાહી છે. દરમિયાન આજે ઉત્તર, દક્ષિણ, મધ્ય અને સૌરાષ્ટ્ર-કચ્છમાં છૂટાછવાયા સ્થળ પર હળવા વરસાદની સંભાવના છે.બીજી તરફ, માછીમારોને આગામી છ ઑગસ્ટ સુધી દરિયો ન ખેડવા સૂચના અપાઈ છે. દરમિયાન રાજ્યમાં વરસાદનું જોર ઘટી રહ્યું છે. ગઈકાલે સાંજ સુધીમાં 48 તાલુકામાં વરસાદ થયો છે. સૌથી વધુ 1 ઇંચ વરસાદ મહેસાણા જિલ્લાના જોટાણા તાલુકામાં થયાના અહેવાલ છે. આ સાથે જ ગત રાત્રીથી લઈ આજ સવાર સુધીમાં અમદાવાદ સહિત ઘણા વિસ્તારોમાં વરસાદ પડ્યો છે.ભાવનગર જિલ્લામાં ચોમાસાના પ્રારંભથી અત્યાર સુધી એમ બે માસમાં કુલ 516 મી.મી. વરસાદ થયો છે. જિલ્લાના મુખ્ય 12 જળાશયોમાં અત્યાર સુધીમાં 448.16 મિલિયન ક્યુબિક મીટર પાણીનો સંગ્રહ થયો છે. ભાવનગર જિલ્લાનો શેત્રુંજી ડેમ ઓવરફ્લો થઈ ગયો છે.