હવામાન વિભાગ દ્વારા આગામી 4 દિવસો માટે રાજ્યમાં ભારે વરસાદની આગાહી કરવામાં આવી છે. આજે ભાવનગર, અમરેલી, ગીર સોમનાથ, દીવ, ભરૂચ, સુરત, તાપી, નવસારી, ડાંગ, વલસાડ, દમણ અને દાદરા નગરહવેલીમાં ભારે વરસાદને લઈને યેલો એલર્ટ જાહેર કરાયું છે.
આવતીકાલે 26 ઓક્ટોબરે ભાવનગર, બોટાદ, અમરેલીમાં ભારેથી અતિભારે વરસાદને લઈને ઓરેન્જ એલર્ટ જ્યારે અરવલ્લી, મહીસાગર, દાહોદ, ખેડા, આણંદ, વડોદરા, છોટા ઉદેપુર, પંચમહાલ, ભરૂચ, નર્મદા, સુરત, તાપી, નવસારી, ડાંગ, વલસાડ, દમણ અને દાદરા નગરહવેલી, અમદાવાદ, સુરેન્દ્રનગર, રાજકોટ, જુનાગઢ, પોરબંદર, ગીર સોમનાથ અને દીવમાં ભારે વરસાદને લઈને યેલો એલર્ટ આપવામાં આવ્યું છે. અને માછીમારોને દરિયો ન ખેડવા સૂચના આપવામાં આવી છે.
મળતી માહિતી મુજબ સાંજે 4 વાગ્યા સુધીમાં સૌથી વધુ વલસાડ જિલ્લાના ઉમરગાંવમાં પોણા બે ઇંચ અને ડાંગ જિલ્લાના આહવામાં એક ઇંચથી વધુ વરસાદ નોંધાયો છે. આહવા તાલુકાના અન્ય વિસ્તારમાં પણ વરસાદી ઝાપટા થયાના અહેવાલ છે. તો નવસારી જિલ્લાના ગણદેવીમાં ભારે વરસાદનું ઝાપટું થયું છે.