યુક્રેને રશિયા પર હુમલો કરતા બંદર શહેર નોવોરોસ્સિય્સ્કમાં એક મુખ્ય તેલ ટર્મિનલની માળખાગત સુવિધાને નુકસાન થયું છે. બંને દેશે ગત રાત્રે થયેલા આ હુમલાની પુષ્ટિ કરી છે. યુક્રેનના સેના પ્રમુખે કહ્યું, હુમલામાં બંદર અને તેલ ટર્મિનલ પર માળખાકીય સુવિધાઓની સાથે રશિયાની એસ-400 વાયુ સંરક્ષણ પ્રણાલિને પણ નુકસાન પહોંચ્યું છે.
રશિયાએ હુમલાની પુષ્ટિ કરતા કહ્યું, યુક્રેનના ડ્રૉનના ટુકડા તેલ ડેપો પર પડ્યા હતા. આ હુમલામાં ચાર લોકો ઇજાગ્રસ્ત થયા છે. તેમજ ચાર ઈમારત અને બે મકાનને નુકસાન થયું છે. રશિયાના સંરક્ષણ મંત્રાલયે જણાવ્યું, આખી રાત યુક્રેનના 216 ડ્રૉનને રોકવામાં આવ્યા.
દરમિયાન રશિયાએ પણ યુક્રેન પર ભીષણ હવાઈ હુમલો કર્યો છે. સ્થાનિક અધિકારીઓએ જણાવ્યું, પાટનગર કીવમાં રશિયાના હુમલામાં સાત લોકોના મોત અને અનેક લોકો ઇજાગ્રસ્ત થયા છે.