મુખ્યમંત્રી ભૂપેન્દ્ર પટેલે આજે બનાસકાંઠા જિલ્લાના પાલનપુર ખાતેથી એક હજાર કરોડ રૂપિયાથી વધુ વિકાસ કાર્યોનું લોકાર્પણ અને ખાતમુહૂર્ત કર્યું. જેમાં 562 કરોડ રૂપિયાના ખર્ચે નિર્માણાધીન 24 કિલોમીટર લંબાઈના પાલનપુર ગ્રીનફિલ્ડ બાયપાસ માર્ગનું ખાતમુહૂર્ત કરાયું. આ પ્રસંગે શ્રી પટેલે જણાવ્યું, વિશ્વનો સૌથી મોટો રિન્યૂએબલ એનર્જી પાક ગુજરાતમાં બની રહ્યો છે.
મુખ્યમંત્રીના હસ્તે આજે સાતથી વધુ વિકાસ કાર્યોનું લોકાર્પણ તથા 15 થી વધુ વિકાસ કામોનું ખાતમુહૂર્ત કરાયું જેમાં ઉમરદશી નદી પર નવીન ચાર માર્ગીય પુલ, પ્રાથમિક આરોગ્ય કેન્દ્ર, પાલનપુર ખાતે અનુસૂચિત જાતિના વિધાર્થીઓ માટે કુમાર છાત્રાલયનું લોકાર્પણ અને લક્ષ્મીપૂરા ખાતે 71 કરોડ રૂપિયાથી વધુના ખર્ચે રેલવે ઓવર બ્રિજ અને પાટણ-ડીસા માર્ગ પર 125 કરોડ રૂપિયાથી વધુના ખર્ચે ચાર માર્ગીય રેલવે ઓવર બ્રિજનું ખાતમુહૂર્ત કરાયું. આ પ્રસંગે સશક્ત નારી મેળાનો પણ શુભારંભ કરાયો.