મુખ્યમંત્રી ભૂપેન્દ્ર પટેલે કહ્યું, વાઇબ્રન્ટ સમિટની સફળતાથી ગુજરાત આજે વિશ્વના અનેક મોટા ઉદ્યોગગૃહોનું કેન્દ્ર બન્યું છે. આજે અમદાવાદમાં વાઈબ્રન્ટ ગુજરાત પ્રાદેશિક સંમેલન-VGRCના લોગો, વેબસાઈટ અને મોબાઇલ એપ્લિકેશનનો શુભારંભ કરાવતા શ્રી પટેલે જણાવ્યુ, રાજ્યમાં યોજાનાર વાઇબ્રન્ટ ગુજરાત પ્રાદેશિક સંમેલનો દરેક પ્રદેશની ઔદ્યોગિક – આર્થિક ક્ષમતા અને રોકાણો માટેની સજ્જતાનું મંચ બનશે.
શ્રી પટેલે કહ્યું, 20થી વધુ નીતિથી રાજ્ય સરકારે ગુજરાતને નીતિ સંચાલિત રાજ્ય બનાવ્યું છે. રાજ્યના અલગ અલગ ચાર ઝોનમાં આવા સંમેલનો યોજાશે, જેમાં 9 ઓક્ટોબરે મહેસાણા જિલ્લામાં પ્રથમ વાયબ્રન્ટ ગુજરાત પ્રાદેશિક સંમેલન યોજાશે. ત્યારબાદ સૌરાષ્ટ્ર, મધ્ય ગુજરાત અને દક્ષિણ ગુજરાતમાં પણ આ સંમેલનોનું આયોજન થશે.
ઉદ્યોગોને આત્મનિર્ભર ભારત અને વોકલ ફોર લોકલ અને લોકલ ફોર ગ્લોબલનું દિશાદર્શન કરીને અગ્રેસર રહેવા VGRC મહત્વનું મંચ બનશે તેવો મુખ્યમંત્રીએ વિશ્વાસ વ્યક્ત કર્યો. આ પ્રસંગે ઉદ્યોગ મંત્રી બળવંતસિંહ રાજપૂત અને કૃષિ મંત્રી રાઘવજી પટેલ તથા રાજ્યમંત્રી ભીખુસિંહ પરમાર ઉપસ્થિત રહ્યા હતા.