ભારત અને ભૂટાન કુલ ચાર હજાર ૩૩ કરોડ રૂપિયાના ખર્ચે બે સરહદ પાર રેલવે સંપર્ક પરિયોજના સ્થાપિત કરવા સંમત થયા છે. જેમાં કોકરાઝાર-ગેલેફુ અને બનારહાટ-સમત્સેનો સમાવેશ થાય છે.
નવી દિલ્હીમાં એક સંયુક્ત પત્રકાર પરિષદને સંબોધતા, કેન્દ્રીય રેલવે મંત્રી અશ્વિની વૈષ્ણવે જણાવ્યું હતું કે આ પરિયોજના ભૂટાનના બે શહેરો ગેલેફુ અને સમત્સેને જોડશે. તેમણે કહ્યું કે, આ બંને પરિયોજના ભારતીય રેલવે નેટવર્કથી આસામના કોકરાઝાર અને પશ્ચિમ બંગાળના બનારહાટમાં શરૂ થશે. શ્રી વૈષ્ણવે ઉમેર્યું હતું કે કોકરાઝાર-ગેલફુ વચ્ચેનો લગભગ 69 કિલોમીટર લાંબો રેલવે માર્ગ ત્રણ હજાર 456 કરોડ રૂપિયાના ખર્ચે બનાવાશે, જ્યારે 20 કિલોમીટર લાંબી બનારહાટ-સમત્સે રેલવે પરિયોજના 577 કરોડ રૂપિયાના ખર્ચે બનાવાશે.
આ પ્રસંગે, વિદેશ સચિવ વિક્રમ મિસ્ત્રીએ જણાવ્યું હતું કે ભારત દ્વારા ભૂટાન સાથે રેલવે જોડાણ પરિયોજનાનો આ પહેલો તબકકો હશે. તેમણે કહ્યું કે, આ કનેક્ટિવિટી માટે સમજૂતી કરાર ગયા વર્ષે પ્રધાનમંત્રી નરેન્દ્ર મોદીની ભૂટાનની મુલાકાત દરમિયાન હસ્તાક્ષર કરાયા હતા.