પ્રધાનમંત્રી નરેન્દ્ર મોદી અને જાપાનના પ્રધાનમંત્રી શિગેરુ ઈશિબાએ બંને દેશો વચ્ચે વ્યૂહાત્મક, આર્થિક અને ટેકનોલોજીકલ સહયોગ વધારવા માટે એક દાયકા માટે એક વ્યાપક કાર્ય યોજનાને અંતિમ સ્વરૂપ આપ્યું છે. ગઈકાલે ટોક્યોમાં શિખર સંમેલન વાટાઘાટો પછી બંને નેતાઓએ આ જાહેરાત કરી હતી.
સોશિયલ મીડિયા પોસ્ટમાં પ્રધાનમંત્રી મોદીએ કહ્યું – 15મી ભારત-જાપાન વાર્ષિક શિખર સંમેલન દરમિયાન, તેમણે અને પ્રધાનમંત્રી ઈશિબાએ દ્વિપક્ષીય સંબંધોના તમામ પાસાઓની સમીક્ષા કરી અને ખાસ વ્યૂહાત્મક અને વૈશ્વિક ભાગીદારીને મજબૂત બનાવવા સંમત થયા.
પ્રધાનમંત્રીએ ભારત અને જાપાનની મુક્ત, શાંતિપૂર્ણ, સમૃદ્ધ અને નિયમો આધારિત હિન્દ પ્રશાંત ક્ષેત્ર પ્રત્યેની પ્રતિબદ્ધતાની પુનઃપુષ્ટિ કરી.
શ્રી મોદીએ ISRO અને જાપાન એરોસ્પેસ એક્સપ્લોરેશન એજન્સી -JAXA વચ્ચે ચંદ્રયાન-5 મિશન માટે થયેલા કરારનું પણ સ્વાગત કર્યું.
આ પ્રસંગે બોલતા, જાપાનના પ્રધાનમંત્રીએ ભારતના પરિવર્તનશીલ વૈશ્વિક પ્રભાવની પ્રશંસા કરી અને જાપાનના અર્થતંત્રમાં કુશળ ભારતીય પ્રતિભાના વધુ એકીકરણ માટે હાકલ કરી.
બાદમાં, પ્રધાનમંત્રી મોદીની જાપાન મુલાકાત અંગે મીડિયાને માહિતી આપતા, વિદેશ સચિવ વિક્રમ મિશ્રીએ જણાવ્યું હતું કે બંને દેશો સુરક્ષા સહયોગ પર સંયુક્ત ઘોષણાપત્ર અપનાવવા સંમત થયા છે, જે શાસન પર આધારિત મુક્ત, શાંતિપૂર્ણ અને આર્થિક રીતે ગતિશીલ હિન્દ પ્રશાંત ક્ષેત્ર માટે એક સહિયારા દ્રષ્ટિકોણને મજબૂત બનાવશે.