પ્રધાનમંત્રી નરેન્દ્ર મોદીએ કહ્યું, ભારત સ્વચ્છ ગતિશીલતા ઉકેલોના વિશ્વસનીય કેન્દ્ર તરીકે ઉભરી આવવા માટે તૈયાર છે. ગુજરાતના હાંસલપુરથી સુઝુકીના પ્રથમ મેડ-ઇન-ઇન્ડિયા બેટરી ઇલેક્ટ્રિક વાહન ‘ઇ-વિટારા’ને લીલીઝંડી આપ્યા બાદ શ્રી મોદીએ ભારત અને જાપાન વચ્ચે ગાઢ ભાગીદારી પર પ્રકાશ પાડી 2047 સુધીમાં આત્મનિર્ભરતા હાંસલ કરવાની ભારતની યાત્રામાં મુખ્ય વિકાસ ભાગીદાર તરીકે જાપાનની ભૂમિકાનો પુનરોચ્ચાર કર્યો. ગુજરાતની બે દિવસીય મુલાકાતે આવેલા પીએમ મોદીએ આજે ગુજરાત સ્થિત TDS લિથિયમ-આયન બેટરી પ્લાન્ટ ખાતે હાઇબ્રિડ બેટરી ઇલેક્ટ્રોડના સ્થાનિક ઉત્પાદનનું ઉદ્ઘાટન પણ કર્યું. શ્રી મોદીએ કહ્યું, ત્રણ જાપાની કંપનીઓ ભારતમાં પહેલી વાર સંયુક્ત રીતે બેટરી સેલનું ઉત્પાદન કરશે.

શ્રી મોદીએ વૈશ્વિક ભાગીદારી બનાવવા માટે ભારતની “લોકશાહીની શક્તિ, વસ્તી વિષયક લાભ અને કુશળ કાર્યબળ પર ભાર મૂક્યો. તેમણે જણાવ્યુ મેક ઇન ઇન્ડિયા પહેલે વૈશ્વિક અને સ્થાનિક ઉત્પાદકો બંને માટે અનુકૂળ વાતાવરણ બનાવ્યું છે. તેમણે સુઝુકીના આ પગલાને મેડ ઇન ઇન્ડિયા અને મેક ફોર ધ વર્લ્ડનું ઉત્તમ ઉદાહરણ ગણાવ્યું.

સ્વચ્છ ઉર્જા અને સ્વચ્છ ગતિશીલતાના મહત્વ પર ભાર મૂકતા, પ્રધાનમંત્રી મોદીએ કહ્યું, “સ્વચ્છ ગતિશીલતા ભવિષ્ય છે, અને ભારત સ્વચ્છ ગતિશીલતા ઉકેલો માટે એક વિશ્વસનીય કેન્દ્ર તરીકે ઉભરી આવવા માટે તૈયાર છે.” તેમણે કહ્યું કે મિશન મેન્યુફેક્ચરિંગની સાથે, સરકારે ઓટો ઉદ્યોગની દુર્લભ પૃથ્વી ચુંબકની વધતી માંગને પહોંચી વળવા માટે રાષ્ટ્રીય ક્રિટિકલ મિનરલ મિશન પણ શરૂ કર્યું છે.

નવા લોન્ચ થયેલા વાહનોની યુરોપ અને જાપાન જેવા મુખ્ય બજારો સહિત 100થી વધુ દેશોમાં નિકાસ કરાશે. ગુજરાતની તેમની બે દિવસીય મુલાકાત દરમિયાન, પ્રધાનમંત્રીએ અમદાવાદમાં સુઝુકી મોટરના હાંસલપુર પ્લાન્ટમાં પ્રદર્શનની પણ મુલાકાત લીધી.