પ્રધાનમંત્રી નરેન્દ્ર મોદીએ જણાવ્યું કે ભારતની સાંસ્કૃતિક વિવિધતા દેશના વિવિધ ભાગોમાં બનેલા કાપડમાં પ્રતિબિંબિત થાય છે. આજે નવી દિલ્હીના ભારત મંડપમ ખાતે ભારત ટેક્સ 2025માં સભાને સંબોધતા શ્રી મોદીએ કહ્યું કે, ફાર્મ, ફાઇબર, ફેબ્રિક, ફેશન અને ફોરેનનું વિઝન એક મિશન બની ગયું છે અને ભારતના વિકાસના વિવિધ ક્ષેત્રોનો વિસ્તાર કરી રહ્યું છે. તેમણે કહ્યું કે આજે ભારત છઠ્ઠો સૌથી મોટો કાપડ નિકાસકાર દેશ છે. તેમણે કહ્યું કે કાપડ ક્ષેત્રમાં ભારતની નિકાસ હાલમાં 3 લાખ કરોડ રૂપિયા છે અને 2030 સુધીમાં તેને 9 લાખ કરોડ રૂપિયા સુધી લઈ જવાનું લક્ષ્ય છે.
આ દરમિયાન શ્રી મોદી એ પ્રદર્શન સ્થળની મુલાકાત લઈ પ્રદર્શકો સાથે વાતચીત કરી. ભારત ટેક્સ 14 થી 17 ફેબ્રુઆરી દરમિયાન યોજાઈ રહ્યો છે. આ કાર્યક્રમ કાચા માલથી લઈને તૈયાર ઉત્પાદનો અને સહાયક સાધનો સુધીની સમગ્ર કાપડ મૂલ્ય શૃંખલાને એક છત નીચે લાવે છે. ભારત ટેક્સ પ્લેટફોર્મ કાપડ ઉદ્યોગનો સૌથી મોટો અને સૌથી વ્યાપક કાર્યક્રમ છે.