પ્રધાનમંત્રી નરેન્દ્ર મોદીએ વૈશ્વિક વિકાસના માપદંડો પર ઊંડાણપૂર્વક પુનર્વિચાર કરવા હાકલ કરી છે. દક્ષિણ આફ્રિકાના જોહાનિસબર્ગમાં G20 નેતાઓની સમિટના પ્રથમ સત્રને સંબોધતા શ્રી મોદીએ કહ્યું કે G20 એ વૈશ્વિક નાણાં અને વિકાસને આકાર આપ્યો છે, પરંતુ વર્તમાન મોડેલે મોટી વસ્તીને સંસાધનોથી વંચિત રાખી છે. તેમણે કહ્યું કે આનાથી પ્રકૃતિનું વધુ પડતું દોહન થયું છે, જેની અસરો ખાસ કરીને આફ્રિકામાં દેખાય છે.
પ્રધાનમંત્રીએ કહ્યું કે નવી દિલ્હીમાં યોજાયેલી G20 સમિટ દરમિયાન લેવામાં આવેલા ઘણા ઐતિહાસિક નિર્ણયોને આગળ ધપાવવામાં આવ્યા છે. શ્રી મોદીએ કુશળ સ્થળાંતર, પર્યટન, ખાદ્ય સુરક્ષા, કૃત્રિમ બુદ્ધિમત્તા, ડિજિટલ અર્થતંત્ર, નવીનતા અને મહિલા સશક્તિકરણ જેવા ક્ષેત્રોમાં દક્ષિણ આફ્રિકાના રાષ્ટ્રપતિના પ્રયાસોની પ્રશંસા કરી.
શ્રી મોદીએ ભારતની સભ્યતા જ્ઞાન પરંપરા પર આધારિત ‘સમગ્ર માનવતાવાદ’ ની વિભાવનાનો ઉલ્લેખ કર્યો, જે વિકાસ અને પ્રકૃતિ વચ્ચે સંતુલન જાળવવાનો માર્ગ બતાવે છે. તેમણે પોતાના સંબોધનમાં “એક પૃથ્વી, એક પરિવાર, એક ભવિષ્ય” ના વિઝનને મૂર્તિમંત કરતા ચાર મુખ્ય પ્રસ્તાવો પણ રજૂ કર્યા.
શ્રી મોદીએ G20 હેઠળ પરંપરાગત જ્ઞાનનો વૈશ્વિક ભંડાર સ્થાપવાનો પ્રસ્તાવ મૂક્યો.
આ પ્રસંગે, પ્રધાનમંત્રીએ G20 આફ્રિકા-કૌશલ્ય પહેલનો પણ પ્રસ્તાવ મૂક્યો. કેફી દ્રવ્યોના દુરુપયોગના વધતા પડકાર સામે, ખાસ કરીને ફેન્ટાનાઇલ જેવા ખતરનાક પદાર્થોના ફેલાવાને રોકવા માટે, પ્રધાનમંત્રીએ ડ્રગ-આતંકવાદી જોડાણનો સામનો કરવા માટે G20 પહેલનો પણ પ્રસ્તાવ મૂક્યો. શ્રી મોદીએ સભ્ય દેશોને ડ્રગ-આતંકવાદી અર્થતંત્રને નબળા પાડવા માટે એક થવા અપીલ પણ કરી.
આફ્રિકામાં આ પહેલી વાર G20 સમિટ યોજાઈ રહી છે.