બિહારમાં વિધાનસભા ચૂંટણીને લઈ તમામ રાજકીય પક્ષ પૂરજોશમાં પ્રચાર કરી રહ્યા છે. રાષ્ટ્રીય લોકતાંત્રિક ગઠબંધન – NDA અને મહાગઠબંધન બંનેના અગ્રણી પ્રચારક તથા વરિષ્ઠ નેતાઓ મતદારોને આકર્ષવા વિવિધ ચૂંટણી સભાઓ કરી રહ્યા છે. પ્રધાનમંત્રી અને ભાજપના વરિષ્ઠ નેતા નરેન્દ્ર મોદીએ આજે બિહારના મુઝફ્ફરપુરમાં ચૂંટણી સભા સંબોધી. દરમિયાન તેમણે રાષ્ટ્રીય જનતા દળ – RJD અને કૉંગ્રેસ પર પ્રહાર કર્યા હતા.
હવે શ્રી મોદી આજે છપરામાં બીજી ચૂંટણી સભા સંબોધશે. બીજી તરફ, મહાગઠબંધનના મુખ્યમંત્રી પદના ઉમેદવાર અને RJDના નેતા તેજસ્વી પ્રસાદ યાદવ આજે 10 ચૂંટણી સભા સંબોધશે. જેમ જેમ મતદાનનો પ્રથમ તબક્કો નજીક આવી રહ્યો છે, તેમ તેમ વિવિધ પક્ષના નેતાઓ વચ્ચે આક્ષેપ-પ્રતિઆક્ષેપનો દોર તેજ બની રહ્યો છે. ઉલ્લેખનીય છે કે, બિહારમાં વિધાનસભા ચૂંટણીના પ્રથમ તબક્કામાં 121 બેઠક માટે આગામી છ નવેમ્બરે મતદાન થશે.