ગુજરાતના પ્રવાસના બીજા દિવસે પ્રધાનમંત્રી નરેન્દ્ર મોદીએ સુઝુકીના અમદાવાદના હાંસલપુર પ્લાન્ટથી પ્રથમ બેટરી ઇલેક્ટ્રિક વ્હીકલ ‘ઈ-વિટારા’ને પ્રસ્થાન કરાવ્યુ, અને લિથિયમ આયન બેટરી સેલ અને ઇલેક્ટ્રોડના સ્વદેશી ઉત્પાદનનો આરંભ કરાવ્યો. આ પ્રસંગે તેમણે કહ્યું કે, રોકાણ ભલે કોઈ પણ દેશનું હોય, પરંતુ તેમાં પરસેવો ભારતીયનો હોય, તો તે વસ્તુ સ્વદેશી જ છે. તેમણે ઉમેર્યુ કે, આ પ્લાન્ટ સ્વચ્છ ઊર્જાને વેગ આપશે અને કુલ ઉત્પાદનના 80 ટકા બેટરીનું ઉત્પાદન ભારતમાં થશે. તેમણે ઉમેર્યુ હતું કે હવે વિશ્વના 100થી વધુ દેશોમાં ઉપયોગમાં લેવાનારા ઈ-વ્હીકલ પર ‘મેઇડ ઇન ઇન્ડિયા’ લખ્યું હશે, જે ‘વોકલ ફોર લોકલ’ને વધુ બળ આપશે.આ પ્રસંગે પ્રધાનમંત્રીએ કહ્યું કે ગણેશ ઉત્સવના આ ઉલ્લાસમાં આજે ભારતની મેક ઇન ઇન્ડિયાની યાત્રામાં નવો અધ્યાય ઉમેરાઈ રહ્યો છે. ‘મેક ઇન ઇન્ડિયા, મેક ફોર ધ વર્લ્ડ’ના આપણા લક્ષ્યની દિશામાં આ એક મોટી છલાંગ છે. પ્રધાનમંત્રીએ આગામી વર્ષોમાં તમામ મુખ્ય ક્ષેત્રોમાં આગળ વધવાની જરૂરિયાત પર ભાર મૂક્યો, અને આજના પ્રયાસો વિકસિત ભારત@2047નો પાયો મજબૂત બનાવવાની સાથે ભારત-જાપાનની મિત્રતા અતૂટ બનાવશે, તેવો વિશ્વાસ વ્યક્ત કર્યો.પોતાના સંબોધનમાં મુખ્યમંત્રી ભૂપેન્દ્ર પટેલે જણાવ્યું હતું કે, ગુજરાતની ધરતીએ હંમેશા વિકાસ અને પ્રગતિનો માર્ગ અપનાવ્યો છે. સુઝુકી મોટર્સનું આ કદમ ગુજરાતની ઇન્ડસ્ટ્રિયલ યાત્રામાં નવો સ્વર્ણિમ અધ્યાય જોડી રહ્યો છે. પ્રધાનમંત્રી નરેન્દ્ર મોદી બે દિવસનો રાજ્યનો પ્રવાસ પૂર્ણ કરીને બપોર બાદ અમદાવાદ એરપોર્ટ પરથી પરત જવા રવાના થયાં હતાં.