ગાઝામાં યુદ્ધનો અંત લાવવા માટે શાંતિ કરારને અંતિમ સ્વરૂપ આપવા માટે એક આંતરરાષ્ટ્રીય પરિષદ આજથી ઇજિપ્તના શર્મ અલ-શેખમાં શરૂ થઈ રહી છે. ઇજિપ્તના રાષ્ટ્રપ્રમુખ અબ્દેલ ફત્તાહ અલ-સીસી અને અમેરિકન પ્રમુખ ડોનાલ્ડ ટ્રમ્પ આ પરિષદની સહ-અધ્યક્ષતા કરશે. 20થી વધુ દેશોના નેતાઓ ભાગ લે તેવી અપેક્ષા છે.સંયુક્ત રાષ્ટ્રના મહાસચિવ એન્ટોનિયો ગુટેરેસ પણ હાજરી આપશે. ચર્ચાઓ મુખ્યત્વે ગાઝા પટ્ટીમાં યુદ્ધનો અંત લાવવા, પ્રાદેશિક શાંતિ પ્રયાસોને પ્રોત્સાહન આપવા અને પશ્ચિમ એશિયામાં સુરક્ષા અને સ્થિરતા પુનઃસ્થાપિત કરવા પર કેન્દ્રિત હશે.કેન્દ્રીય વિદેશ રાજ્ય મંત્રી કીર્તિ વર્ધન સિંહ શાંતિ પરિષદમાં ભારતનું પ્રતિનિધિત્વ કરશે. સોશિયલ મીડિયા સંદેશમાં, તેમણે શાંતિ પરિષદ માટે પ્રધાનમંત્રી નરેન્દ્ર મોદીના ખાસ પ્રતિનિધિ તરીકે કૈરોમાં તેમના આગમનની જાહેરાત કરી. ગુરુવારે, પ્રધાનમંત્રી મોદીએ શાંતિ યોજનાના પ્રથમ તબક્કા પર ઇઝરાયલ અને હમાસ વચ્ચે થયેલા કરારનું સ્વાગત કર્યું.