કેન્દ્રીય ગૃહમંત્રી અમિત શાહે કહ્યું, દેશમાં ગત એક દાયકામાં સ્ટાર્ટ-અપ ક્ષેત્રમાં અભૂતપૂર્વ વિકાસ થયો છે, જેના પરિણામે ભારત આજે વિશ્વનું ત્રીજું સૌથી મોટું સ્ટાર્ટ-અપ તંત્ર બન્યું છે. ગાંધીનગરના મહાત્મા મંદિર ખાતે આજે બે દિવસની સ્ટાર્ટ-અપ પરિષદનો પ્રારંભ કરાવતા શ્રી શાહે સ્ટાર્ટ-અપ વ્યવસ્થાને નવા ભારતની કરોડરજ્જૂ સમાન ગણાવી. તેમણે આગામી ત્રણ વર્ષમાં યુવાશક્તિના આધારે ભારત વૈશ્વિક નવિનતા સૂચિમાં ટોચના 10 દેશમાં સ્થાન પામશે તેવો વિશ્વાસ પણ વ્યક્ત કર્યો.

રાજ્યમાં સ્ટાર્ટ-અપ ક્ષેત્રે લેવાયેલા પગલાને આવકારતા શ્રી શાહે કહ્યું, 16 હજાર સ્ટાર્ટ-અપ સાથે ગુજરાત આજે દેશમાં અગ્રણી છે. તેમણે દેશના અન્ય રાજ્યોને ગુજરાતનું આઈ-હબ નમૂનાને અપનાવવા પણ સૂચન કર્યું.

આ પ્રસંગે સંબોધન કરતા મુખ્યમંત્રી ભૂપેન્દ્ર પટેલે કહ્યું, યુવા ઉદ્યોગ સાહસિકોને પ્રોત્સાહન પૂરું પાડવા મોદી સરકારે વ્યાપક પગલા લીધા છે. અને સેમિ—કન્ડકટર જેવા ઉભરાતા ક્ષેત્રના દ્વાર યુવાનો માટે ખોલ્યા છે. રાજ્યમાં આ વર્ષે ચાર પ્રાદેશિક સ્ટાર્ટ-અપ કેન્દ્ર અને છ સરકારી સંસ્થામાં કૃત્રિમ બુદ્ધિમત્તા- A.I. પ્રયોગશાળા બનાવાશે તેમ પણ શ્રી પટેલે ઉમેર્યું.