કેન્દ્રીય કૃષિમંત્રી શિવરાજસિંહ ચૌહાણે પ્રાકૃતિક ખેતીના વિસ્તરણ અને નિરીક્ષણ માટે રાષ્ટ્રીય સમિતિ બનાવવાની જાહેરાત કરી છે. તેમણે કહ્યું, રાજ્યસ્તરે પણ આ સમિતિઓ રચાશે, જે જિલ્લા વિકાસ અધિકારી મારફતે પ્રાકૃતિક ખેતીની પ્રગતિનો અહેવાલ સરકાર સુધી પહોંચાડશે.
રાજ્યપાલ આચાર્ય દેવવ્રત સાથે ગુરુકુલ કુરુક્ષેત્રના પ્રાકૃતિક કૃષિ ફાર્મની મુલાકાત લેતા ગઈકાલે શ્રી ચૌહાણે આ જાહેરાત કરી હતી. દરમિયાન શ્રી ચૌહાણે કહ્યું, “શ્રી દેવવ્રત દ્વારા શરૂ કરાયેલું પ્રાકૃતિક ખેતી અભિયાન હવે રાષ્ટ્રીય પ્રાકૃતિક ખેતી અભિયાન તરીકે જન-આંદોલનનું સ્વરૂપ ધારણ કરી રહ્યું છે. અભિયાન થકી દેશનો ખેડૂત આર્થિક રીતે તો સમૃદ્ધ બનશે જ, પરંતુ જમીનની ફળદ્રુપતામાં સુધારો તેમજ 50 ટકા સુધી પાણીની બચત શક્ય બનશે.”