ગઇકાલે રાત્રે કેનેડાના કનાનાસ્કિસ ખાતે G7 સમિટ દરમિયાન પ્રધાનમંત્રી નરેન્દ્ર મોદીએ કેનેડા, જર્મની, ફ્રાન્સ, મેક્સિકો અને દક્ષિણ કોરિયાના નેતાઓ સાથે દ્વિપક્ષીય બેઠકોની શ્રેણી યોજી હતી.પ્રધાનમંત્રી મોદી અને જર્મન ચાન્સેલર ફ્રેડરિક મેર્ઝ વચ્ચેની દ્વિપક્ષીય બેઠકમાં, બંને નેતાઓએ મુખ્ય ક્ષેત્રોમાં ભારત-જર્મની દ્વિપક્ષીય સહયોગને મજબૂત બનાવવાની રીતો પર ચર્ચા કરી. આ ક્ષેત્રોમાં વેપાર અને રોકાણ, સંરક્ષણ અને સુરક્ષા, ગ્રીન સસ્ટેનેબલ ડેવલપમેન્ટ ભાગીદારી, ગ્રીન એનર્જી, ટેકનોલોજી, નવીનતા, શિક્ષણ અને ગતિશીલતાનો સમાવેશ થાય છે. તેમણે પ્રાદેશિક અને આંતરરાષ્ટ્રીય વિકાસ પર પણ વિચારોનું આદાન-પ્રદાન કર્યું. પ્રધાનમંત્રી મોદીએ આતંકવાદ સામેની લડાઈમાં જર્મનીના ભારતને સમર્થન આપવા બદલ ચાન્સેલર મેર્ઝનો આભાર માન્યો. સોશિયલ મીડિયા પોસ્ટમાં, શ્રી મોદીએ કહ્યું કે તેઓએ સંરક્ષણ અને સુરક્ષા સંબંધોને વધુ ગાઢ બનાવવા પર પણ ચર્ચા કરી. તેમણે કહ્યું કે બંને રાષ્ટ્રો આતંકવાદ સામેની લડાઈ અને આતંકવાદી ભંડોળને ડામવા સાથે મળીને કામ કરતા રહેશે. શ્રી મોદીએ સમિટ દરમિયાન મેક્સિકોના રાષ્ટ્રપતિ ક્લાઉડિયા શેનબૌમ પાર્ડો સાથે પણ મુલાકાત કરી. બંને નેતાઓ વચ્ચે આ પહેલી મુલાકાત હતી. પ્રધાનમંત્રીએ આતંકવાદ સામેની ભારતની લડાઈમાં મેક્સિકો દ્વારા આપવામાં આવેલા સમર્થન બદલ રાષ્ટ્રપતિ શેનબૌમનો આભાર માન્યો.ભારત અને મેક્સિકો વચ્ચેના ઐતિહાસિક મિત્રતાના બંધનો પર ભાર મૂકતા, બંને નેતાઓ વેપાર, રોકાણ, સ્ટાર્ટ-અપ્સ, નવીનતા, વિજ્ઞાન અને ટેકનોલોજી અને ઓટોમોટિવ ક્ષેત્રોમાં સંબંધોને વધુ વિસ્તૃત કરવા અને લોકો-થી-લોકોના આદાનપ્રદાનને પ્રોત્સાહન આપવા માટે સંમત થયા. તેમણે બંને દેશો વચ્ચે વધતા વેપાર અને રોકાણ સહયોગ પર સંતોષ વ્યક્ત કર્યો. ચર્ચામાં ફાર્માસ્યુટિકલ, કૃષિ અને સર્વાંગી આરોગ્ય ક્ષેત્રોમાં વધતી તકો મુખ્ય હતી. પ્રધાનમંત્રી મોદીએ ભાર મૂક્યો કે બંને દેશોએ સેમિકન્ડક્ટર, એઆઈ, ક્વોન્ટમ અને મહત્વપૂર્ણ ખનિજોના ક્ષેત્રોમાં સહયોગ સાધવો જોઈએ. નેતાઓએ વૈશ્વિક અને પ્રાદેશિક મુદ્દાઓ અને ગ્લોબલ સાઉથની પ્રાથમિકતાઓ પર પણ વિચારોનું આદાનપ્રદાન કર્યું.પ્રધાનમંત્રીએ દક્ષિણ કોરિયાના રાષ્ટ્રપતિ લી જે-મ્યુંગ સાથે દ્વિપક્ષીય બેઠક પણ યોજી. બંને નેતાઓએ વેપાર અને અર્થતંત્ર, મહત્વપૂર્ણ અને ઉભરતી તકનીકો, ગ્રીન હાઇડ્રોજન, જહાજ નિર્માણ અને સંસ્કૃતિ સહિતના ક્ષેત્રોમાં ભાગીદારી દ્વારા સહયોગ માટે નવા માર્ગો શોધીને ભારત-દક્ષિણ કોરિયા વિશેષ વ્યૂહાત્મક ભાગીદારીને વધુ ગાઢ બનાવવાની તેમની પ્રતિબદ્ધતાનો પુનરોચ્ચાર કર્યો . તેમણે પ્રાદેશિક અને વૈશ્વિક મુદ્દાઓ પર પણ ચર્ચા કરી.શ્રી મોદીએ ફ્રાન્સના રાષ્ટ્રપતિ ઇમેન્યુઅલ મેક્રોન સાથે પણ એક મહત્વપૂર્ણ મુલાકાત કરી.તેમણે G7 આઉટરીચ સમિટમાં દક્ષિણ આફ્રિકાના રાષ્ટ્રપતિ સિરિલ રામાફોસા, ઓસ્ટ્રેલિયાના પ્રધાનમંત્રી એન્થોની અલ્બેનીસ, ઇટાલીના વડા પ્રધાન જ્યોર્જિયા મેલોની, યુકેના પ્રધાનમંત્રી કીર સ્ટારમર અને બ્રાઝિલના રાષ્ટ્રપતિ લુઇઝ ઇનાસિયો લુલા દા સિલ્વા સાથે પણ વાતચીત કરી.