હવામાન વિભાગે રાજ્યમાં આ વખતે ચોમાસું વહેલું આવવાની આગાહી વ્યક્ત કરી છે. દરમિયાન આજે અરવલ્લી, પંચમહાલ, દાહોદ, મહીસાગર, છોટાઉદેપુર, નર્મદા, ડાંગ, નવસારી, વલસાડ, તાપી અને દમણ, દાદરા અને નગરહવેલીમાં છૂટાછવાયા સ્થળ પર વરસાદની શક્યતા છે. આ ઉપરાંત રાજકોટ, અમરેલી અને ભાવનગરમાં હળવાથી મધ્યમ વરસાદ વરસી શકે છે એમ હવામાન ખાતાના નિયામક ડૉક્ટર એ. કે. દાસે જણાવ્યું. રાજ્યમાં ગઈકાલે કેટલાક જિલ્લામાં કમોસમી વરસાદ વરસ્યો. સત્તાવાર યાદી મુજબ, સવારે છ વાગ્યાથી રાત્રે આઠ વાગ્યા સુધી માત્ર ચાર તાલુકામાં હળવોથી મધ્યમ વરસાદ વરસ્યો. દરમિયાન સૌથી વધુ બે ઈંચ વરસાદ નર્મદાના સાગબારા તાલુકામાં નોંધાયો.