અરબસાગરમાં ડિપ્રેશન સક્રિય થતા હવામાન વિભાગ દ્વારા આજે સૌરાષ્ટ્ર અને દક્ષિણ ગુજરાતમાં ભારે વરસાદની આગાહી કરવામાં આવી છે. આજે બોટાદ, ભાવનગર, અમરેલી, ગીર સોમનાથ, દીવ, ભરૂચ, સુરત, નવસારી, વલસાડ, દમણ અને દાદરા નગર હવેલીમાં ભારેથી અતિભારે વરસાદને લઈને ઓરેન્જ એલર્ટ અને પોરબંદર, જુનાગઢ, રાજકોટ, સુરેન્દ્રનગર, અમદાવાદ, અરવલ્લી, ખેડા, આણંદ, મહીસાગર, પંચમહાલ, દાહોદ, વડોદરા, છોટાઉદેપુર, નર્મદા, તાપી અને ડાંગમાં ભારે વરસાદને લઈને યેલો એલર્ટ આપવામાં આવ્યું છે.
જ્યારે આવતીકાલ 27 ઓક્ટોબરે અમરેલી, ગીર સોમનાથ અને દીવમાં ભારેથી અતિ ભારે વરસાદને લઈને ઓરેન્જ એલર્ટ અને કચ્છ, બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી, મહીસાગર, ખેડા, અમદાવાદ, સુરેન્દ્રનગર, મોરબી, જામનગર, રાજકોટ, દેવભૂમિ દ્વારકા, પોરબંદર, જુનાગઢ, ભાવનગર, બોટાદ, આણંદ, ભરૂચ, સુરત, નવસારી, વલસાડ, દમણ અને દાદરા નગર હવેલીમાં ભારે વરસાદને લઈને યેલો એલર્ટ આપવામાં આવ્યું છે.
આ આગાહીને પગલે ભરૂચ જિલ્લાના તમામ નવ તાલુકામાં ગઇકાલે મોડી રાતે વરસાદ વરસતા ખેતીના પાકને વ્યાપક નુકસાનની શક્યતા વ્યક્ત કરવામાં આવી રહી છે. તો પંચમહાલ જિલ્લામાં ગોધરા શહેર સહિત સમગ્ર જિલ્લામાં માવઠું થતાં ખેડૂતો ચિંતિત બન્યા છે. તો ભાવનગરના મહુવામાં પણ ગઇકાલે મોડી રાતે દોઢ ઇંચ જ્યારે છોટાઉદેપુર જિલ્લાના કવાંટ તાલુકાના પાનવાડ પંથકના રૂમડીયા વાંટડા, કનલવા, સિંહાદા સહીતના વિસ્તારમાં વહેલી સવારે ધીમી ધારે કમોસમી વરસાદ થયાના અહેવાલ છે.