અમદાવાદના રિવરફ્રન્ટ ઇવેન્ટ સેન્ટર ખાતે યોજાયેલા આંતરરાષ્ટ્રીય પુસ્તક મહોત્સવમાં નેશનલ બુક ટ્રસ્ટ- NBT દ્વારા મૉબાઈલ બસની વિશેષ વ્યવસ્થા કરવામાં આવી છે. લોકોને સાક્ષરતા અભિયાનમાં જોડવામાં મદદરૂપ થવા આ બસને શહેરના દરેક ખૂણામાં મોકલવામાં આવી રહી છે. અત્યાર સુધી રાણાપુર, ધંધુકા જેવા તાલુકાના વિવિધ ગામડાઓમાં અને શાળાઓ તેમજ કોલેજોમાં આ બસ મોકલવામાં આવી રહી છે.
પ્રવાસી ગ્રંથાલયની જેમ કામ કરતી આ મૉબાઈલ બસમાં વિવિધ ભાષાઓના પુસ્તકોનો સંગ્રહ છે. ગ્રામ્ય અને દૂરના વિસ્તારોમાં આ બસ પુસ્તકોની પ્રાપ્યતા સુનિશ્ચિત કરે છે અને વાંચનને પ્રોત્સાહન આપવાનું મહત્ત્વનું કામ કરે છે. હવે પાંચમી ડિસેમ્બરે આ બસ અમદાવાદની સેપ્ટ યુનિવર્સિટી , છઠ્ઠી ડિસેમ્બરે સચિવાલય, સાત ડિસેમ્બરે ઇન્ફો સિટી પરિસર અને આઠ ડિસેમ્બરે ગાંધીનગર આઈઆઈટી જશે તેવી માહિતી નેશનલ બૂક ટ્રસ્ટના સેલ્સ મેનેજર અમિત સિંહે આપી હતી.