કેન્દ્રિય સહકાર મંત્રી અમિત શાહે જણાવ્યું છે કે, સહકારી મોડલ વિશ્વનું એક માત્ર મોડલ છે, જે લોકોનાં કલ્યાણની સાથે સાથે આર્થિક વૃધ્ધિ સુનિશ્ચિત કરે છે. અમદાવાદ ડિસ્ટ્રીક્ટ કો-ઓપરેટિવ- ADC બેન્કના 100મા સ્થાપના દિવસ પ્રસંગે ગાંધીનગરના મહાત્મા મંદિર ખાતે આયોજિત સમારોહમાં શ્રી શાહે આ મુજબ જણાવ્યું હતુ. તેમણે જણાવ્યું કે, લોકોનાં કલ્યાણ વગર કોઈ દેશ આર્થિક વૃધ્ધિ ન કરી શકે.
તેમણે વિશ્વાસ વ્યક્ત કર્યો હતો કે, આગામી ભવિષ્યમાં સહકારી ક્ષેત્રની ભૂમિકા વધુ મહત્વની સાબિત થશે. તેમણે સહકારી ક્ષેત્રમાં અમુલને ઉત્તમ ઉદાહરણ ગણાવ્યું હતું.
આ પ્રસંગે મુખ્યમંત્રી ભુપેન્દ્ર પટેલે જણાવ્યું હતું કે, ADC બેન્કની સ્થાપનાનાં 100 વર્ષ પૂર્ણ કરવા એ અનોખી સિધ્ધિ છે.
રાજ્યના સહકાર મંત્રી જગદીશ વિશ્વકર્માએ જણાવ્યું કે, આજે એડીસી બેંક નાના છોડમાંથી વટ વૃક્ષ બન્યું છે. બેન્કમાં 21 લાખ 44 હજાર નવા એકાઉન્ટ ખુલ્યા છે.