ભારતીય ખેલાડીઓ આયુષ શેટ્ટી અને તન્વી શર્મા યુએસ ઓપન બેડમિન્ટન સ્પર્ધાની સેમિફાઇનલમાં પહોંચી ગયા છે.
આજે અમેરિકાના આયોવામાં યોજાયેલી મહિલા સિંગલ્સ ક્વાર્ટર-ફાઇનલ મેચમાં તન્વીએ મલેશિયાની લેત્શાના કરુપથેવનને 21-13, 21-16 થી હાર આપી હતી. પુરુષોની સિંગલ્સ ક્વાર્ટર-ફાઇનલમાં આયુષે ચાઇનીઝ તાઇપેઈની કુઓ કુઆન લિનને 22-20, 21-9 થી હરાવી હતી. હવે સેમિફાઇનલમાં, તન્વીનો સામનો યુક્રેનની પોલિના બુહારોવા સામે થશે. જ્યારે આયુષનો સામનો ચાઇનીઝ તાઇપેઈની ચૌ ટિએન-ચેન સામે થશે.
પુરુષ ડબલ્સ ક્વાર્ટર-ફાઇનલમાં, ભારતના હરિહરન અમસાકારુનન અને રૂબેન કુમાર રેથિનાસબ્પતિની જોડીને હારનો સામનો કરવો પડ્યો હતો. ભારતીય જોડીનો ચાઇનીઝ તાઇપેઈની ચિયાંગ ચિન વેઈ અને વુ સુઆન-યીની જોડી સામે 9- 21, 19-21થી પરાજય થયો હતો.