আমেৰিকা যুক্তৰাষ্ট্ৰৰ বিভিন্ন প্ৰান্তত বসবাস কৰা প্ৰবাসী ভাৰতীয়সকলে সমবেত হৈ পহলগাম সন্ত্রাসবাদী আক্ৰমণত নিহতসকলৰ আত্মাৰ শান্তিৰ বাবে প্ৰাৰ্থনা কৰে আৰু এই আক্ৰমণত ভুক্তভোগীসকলৰ প্রতি সমবেদনা প্রকাশ কৰে। নিউজাৰ্চিৰ এডিচনত ভাৰতীয়-আমেৰিকান সমুদায়ৰ প্ৰায় ২০ টা সংস্থাৰ ৩০০ৰো অধিক সদস্যই এই জঘন্য সন্ত্রাসবাদী আক্ৰমণৰ গৰিহণা দিয়ে। অনুষ্ঠানত এডিচনৰ মেয়ৰ চেম যোশী আৰু নিউ জাৰ্চি এচেম্বলিৰ সদস্য ৰবাৰ্ট কাৰাবিঞ্চেকে অংশগ্ৰহণ কৰে। কাণেক্টিকাতো ১৬ টা ভাৰতীয় সংস্থাই পৃথকে শ্রদ্ধাঞ্জলি অনুষ্ঠানৰ আয়োজন কৰে। অনুষ্ঠানত অংশগ্ৰহণকাৰীসকলে ৰাষ্ট্ৰীয় সংগীত পৰিৱেশন কৰে আৰু শান্তি আৰু সামুহিক শক্তিৰ বিষয়ত শক্তিশালী বার্তা প্ৰেৰণ কৰে। একেদৰে অ’হায়োৰ কলম্বাছত প্রবাসী ভাৰতীয়সকলে একেলগে ভাৰতীয় আৰু আমেৰিকাৰ পতাকা উৰুৱাই এই ঘটনাৰ বিৰুদ্ধে শোক আৰু একতা প্ৰদৰ্শন কৰে।
কানাডা, ডেনমার্ক, ইংলেণ্ড, ফ্রান্স, ফিনলেণ্ড, জার্মানী, স্পেইন আদিতো ভাৰতীয় সমুদায়ৰ সদস্যসকলে এই আক্ৰমণৰ প্ৰতিবাদত বিভিন্ন কাৰ্যসূচী ৰূপায়ণ কৰে।